વડોદરાના પાદરા અને આણંદ જિલ્લાને જોડતો મહિસાગર નદી પર બનેલો 45 વર્ષ જૂનો ગંભીરા પુલ આજે સવારે તૂટી પડ્યો હતો, જેના કારણે હોબાળો મચી ગયો હતો. આ ઘટનામાં બે ટ્રક, એક બોલેરો જીપ અને પુલ પરથી પસાર થતી એક જીપ સહિત ચાર વાહનો બંને બાજુ વહેતી મહી નદીમાં પડી ગયા હતા. અત્યાર સુધીમાં 11 લોકોના મોત થયાનુ જાણવામાં આવી રહ્યું છે. જ્યારે ઘણા લોકોને બચાવી લેવામાં આવ્યા છે. એવું કહેવાય છે કે આ અકસ્માત વહીવટી બેદરકારીને કારણે થયો હતો અને જ્યારે આ ઘટના બની ત્યારે મુજપુર અને નજીકના ગામોના લોકોનું ટોળું ઘટનાસ્થળે એકઠું થઈ ગયું હતું. લોકોએ નદીમાં ડૂબતા લોકોને બચાવવામાં મદદ કરી હતી.
45 વર્ષ જૂનો આ પુલ જર્જરિત થઈ ગયો હતો
જ્યારે ગંભીરા પુલ પર આ અકસ્માત થયો ત્યારે પુલ પર ઘણા વાહનો આવતા-જતા હતા અને પુલ બે ભાગમાં વિભાજીત થઈ ગયો હતો. પુલ તૂટી પડવાથી લગભગ 5 વાહનો તેમાં પડી ગયા હતા. આ પુલ 1985માં બનાવવામાં આવ્યો હતો. 212 કરોડ રૂપિયાના ખર્ચે નવો પુલ બનાવવાની મંજૂરી પણ આપવામાં આવી હતી. આ પુલ 40 વર્ષ પહેલાં આણંદ જિલ્લાને જોડતા પાદરા તાલુકાના મુજપુર ગામમાંથી પસાર થતી મહી નદી પર બનાવવામાં આવ્યો હતો. તે પાદરા-ગંભીરા પુલ તરીકે ઓળખાય છે. આ પુલ વર્ષોથી જર્જરિત થઈ ગયો હતો. સ્થાનિક રહેવાસીઓનું કહેવું છે કે જ્યારે વાહનો તેના પરથી પસાર થતા હતા ત્યારે પુલ ખતરનાક રીતે ધ્રુજતો હતો.
હાલમાં, પોલીસ અને ડિઝાસ્ટર રિસ્પોન્સ ટીમો બચાવ કામગીરી હાથ ધરી રહી છે. અત્યાર સુધીમાં 10 પુષ્ટિ થયેલા મૃત્યુમાંથી, છ લોકોની ઓળખ થઈ ગઈ છે – વૈદિક પડીયાર (45), નૈતિક પડીયાર (45), હસમુખ પરમાર (32), રમેશ પડીયાર (32), વખાસિંહ જાધવ (26) અને પ્રવિણ જાધવ (26).
વહીવટીતંત્રની બેદરકારીનુ જીવંત ઉદાહરણ
ગંભીરા પુલનું પતન એ વહીવટી તંત્રની બેદરકારીનુ બીજું જીવતુ જાગતુ ઉદાહરણ છે જેમાં ઘણા લોકોના જીવ ગયા છે. આ પુલ 40 વર્ષ પહેલા 1985 માં બનાવવામાં આવ્યો હતો, અને જર્જરિત સ્થિતિમાં હોવા છતાં કાર્યરત હતો. એવું લાગે છે કે કોઈ મોટી દુર્ઘટના થવાની રાહ જોવાઈ રહી હતી. સ્થાનિક ભાજપ ધારાસભ્ય ચૈતન્યસિંહ ઝાલાની ભલામણને પગલે, રાજ્ય સરકારે નવા પુલના નિર્માણને મંજૂરી આપી. એક સર્વે પણ હાથ ધરવામાં આવ્યો હતો અને નવો પુલ બનાવવાની યોજના પર કામ પણ શરૂ થયું હતું. દરમિયાન, ગંભીરા પુલનું સમારકામ કરવામાં આવ્યું હતું અને ટ્રાફિક માટે ખુલ્લો રાખવામાં આવ્યો હતો. આજની દુર્ઘટના પછી, પ્રશ્ન ઉઠાવવામાં આવી રહ્યો છે કે સરકારે જર્જરિત પુલને કેમ બંધ ન કર્યો. જો આ કરવામાં આવ્યું હોત, તો આજે નાગરિકોના મૃત્યુ ન થયા હોત.