ગુરુવારે સવારે લગભગ ૧૧.૩૦ વાગ્યે હરિયાણાના ગુરુગ્રામના સેક્ટર-૫૭ સ્થિત સુશાંત લોક ફેઝ-૨માં એક મહિલા ટેનિસ ખેલાડીની તેના પિતાએ ગોળી મારીને હત્યા કરી દીધી હતી. પ્રારંભિક તપાસમાં જાણવા મળ્યું છે કે ટેનિસ ખેલાડી એકેડેમી ચલાવી રહી હતી અને સોશિયલ મીડિયા પર રીલ બનાવી રહી હતી તેનાથી નારાજ થઈને પિતાએ લાઇસન્સ પ્રાપ્ત રિવોલ્વરથી તેની પીઠમાં ગોળી મારી હતી. આ પછી, રાધિકા યાદવને ગંભીર હાલતમાં ખાનગી હોસ્પિટલમાં લઈ જવામાં આવી હતી, જ્યાં સારવાર દરમિયાન તેનું મૃત્યુ થયું હતું. પોલીસે આરોપી પિતાની ધરપકડ કરીને શુક્રવારે કોર્ટમાં રજૂ કર્યો હતો. જ્યાંથી કોર્ટે આરોપીને એક દિવસના પોલીસ રિમાન્ડ પર મોકલી દીધો છે. દરમિયાન, રાધિકા યાદવનો પોસ્ટમોર્ટમ રિપોર્ટ બહાર આવ્યો છે. જેનાથી પિતાએ FIRમાં કરેલી કબૂલાત ખોટી સાબિત થઈ છે.
પોસ્ટમોર્ટમ રિપોર્ટમાં શું છે?
ટેનિસ ખેલાડી રાધિકા યાદવનો પોસ્ટમોર્ટમ રિપોર્ટ બહાર આવ્યો છે. રિપોર્ટ મુજબ, રાધિકાને છાતી પર ૪ ગોળી વાગી છે, જ્યારે પોલીસ FIRમાં કહેવામાં આવ્યું છે કે આરોપી પિતાએ પાછળથી ત્રણ ગોળી ચલાવી હતી. ઈન્ડિયા ટુડેના અહેવાલ મુજબ, સરકારી હોસ્પિટલના સર્જન અને બોર્ડ સભ્ય ડૉ. દીપક માથુરે પુષ્ટિ આપી છે કે રાધિકાને ચાર ગોળી વાગી હતી અને તેની છાતી પર ગોળીઓના બધા નિશાન મળી આવ્યા છે. ડૉ. માથુરે જણાવ્યું હતું કે શરીરમાંથી બધી ગોળીઓ કાઢીને ફોરેન્સિક તપાસ માટે મોકલી દેવામાં આવી છે. પોસ્ટમોર્ટમ રિપોર્ટ મુજબ, એક ગોળી શરીરમાંથી પસાર થઈ ગઈ હતી, જેના કારણે બે ઘા થયા હતા, જેના કારણે મૂંઝવણ થઈ શકે છે. પોસ્ટમોર્ટમમાં કુલ ચાર ગોળીઓના ઘા હોવાની પુષ્ટિ થઈ છે.
રાધિકા ટેનિસ એકેડેમી ચલાવતી હોવાથી પિતા ગુસ્સે હતા, કાકાએ FIR નોંધાવી
એક સત્તાવાર નિવેદનમાં, પોલીસે દાવો કર્યો હતો કે રાધિકા દ્વારા સંચાલિત ટેનિસ એકેડેમી પિતા અને પુત્રી વચ્ચેના ઝઘડાનું કારણ હતી. રાધિકાના કાકા કુલદીપ યાદવે પોલીસને જણાવ્યું હતું કે જ્યારે આ ઘટના બની ત્યારે તેમણે ‘જોરથી ધડાકો’ સાંભળ્યો અને પહેલા માળે દોડી ગયા, જ્યાં દીપક અને તેનો પરિવાર રહેતો હતો. રાધિકાના કાકા ગુરુગ્રામના સેક્ટર 57માં તે જ ઘરના બીજા માળે રહે છે. રાધિકાના કાકા કુલદીપ યાદવે નોંધાવેલી ફરિયાદના આધારે નોંધાયેલી FIR મુજબ, ઘટના સમયે રાધિકાની માતા મંજુ યાદવ ઘરના પહેલા માળે હાજર હતી. પોલીસે મંજુની પૂછપરછ કરી ત્યારે તેણે નિવેદન આપવાનો ઇનકાર કર્યો હતો. તેણે ફક્ત એટલું જ કહ્યું કે તેને તાવ આવ્યો હતો અને તે તેના રૂમમાં આરામ કરી રહી હતી. ઉપરાંત, મંજુએ પોલીસને કહ્યું કે તેની પુત્રીનું ચારિત્ર્ય ખૂબ જ સારુ હતું.
આરોપી દીપક ગામ લોકોના ટોણાથી નારાજ હતો
ટેનિસ એકેડેમી ખોલ્યા પછી રાધિકાના પિતા ગુસ્સે થયા હતા. તેણે કહ્યું કે જ્યારે પણ તે ગામમાં બહાર જાય છે ત્યારે લોકો તેની સાથે તેની પુત્રીની કમાણી ખાવાની વાત કરે છે. દીપક આ વાતથી ખૂબ જ નારાજ હતો. છેલ્લા 15 દિવસથી પિતા અને પુત્રી વચ્ચે ટેનિસ એકેડેમીને લઈને ઝઘડો ચાલી રહ્યો હતો. ગુરુવારે સવારે જ્યારે બંને વચ્ચે કોઈ વાતને લઈને ઝઘડો થયો ત્યારે પિતા દીપકે પુત્રી રાધિકાને લાયસન્સવાળી રિવોલ્વરથી ગોળી મારી દીધી.
મ્યુઝિક વીડિયો આવ્યો સામે
સૂત્રોના જણાવ્યા અનુસાર, રાધિકા યાદવનું સોશિયલ મીડિયા પર સક્રિય રહેવું અને પ્રભાવશાળી બનવાની તેની ઇચ્છા તેના પિતાને પસંદ નહોતી. રાધિકાની હત્યા પછી, એક મ્યુઝિક વીડિયો પણ સામે આવ્યો છે, જેનું શીર્ષક ‘કારવા’ છે. તેમાં રાધિકા જોવા મળી રહી છે. આ વીડિયો અંગે અનેક અંદાજો લગાવવામાં આવી રહ્યો છે કે શું આ વીડિયો કોઈક રીતે હત્યા સાથે સંબંધિત છે.